ایران اسرائیل کشیدگی شدت اختیار کرگئی، سیکڑوں اسرائیلی ملک چھوڑنے پر مجبور

مشرق وسطیٰ میں ایران اور اسرائیل کے درمیان جاری کشیدگی نے خطرناک رخ اختیار کر لیا ہے۔ بڑھتے ہوئے ایرانی میزائل حملوں اور جنگ کے خدشے کے باعث سیکڑوں اسرائیلی شہری اور غیر ملکی افراد اسرائیل سے نکلنے پر مجبور ہو گئے ہیں۔

بین الاقوامی ذرائع ابلاغ کے مطابق، ایران کی جانب سے جاری حملوں اور کشیدگی کے سبب بڑی تعداد میں اسرائیلی شہری اپنے ملک سے فرار ہو رہے ہیں۔ رپورٹس میں بتایا گیا ہے کہ فضائی حدود بند ہونے کے باعث لوگ چھوٹی کشتیوں کے ذریعے قبرص کی جانب روانہ ہو رہے ہیں۔

ذرائع کے مطابق، اسرائیل چھوڑنے والوں میں غیر ملکی باشندے بھی شامل ہیں جو موجودہ صورتحال کو خطرناک قرار دے رہے ہیں۔ اسرائیلی میڈیا کی رپورٹس کے مطابق حیفہ بندرگاہ سے روانہ ہونے والی کشتیوں پر ہر مسافر سے 800 ڈالر فی کس کرایہ وصول کیا جا رہا ہے۔

اس صورتحال کے پس منظر میں، ایرانی پاسداران انقلاب کے مشیر بریگیڈیئر جنرل احمد واحدی نے اسرائیل کو براہ راست خبردار کیا ہے کہ تہران طویل جنگ کے لیے پوری طرح تیار ہے۔ جنرل احمد واحدی کا کہنا تھا کہ ایران ضرورت پڑنے پر جدید ہتھیاروں کا استعمال بھی کرے گا اور نئی عسکری ایجادات جلد منظر عام پر لائی جائیں گی۔

ان کا مزید کہنا تھا کہ ایران نے اب تک اپنی میزائل طاقت کو اسٹریٹیجک طور پر متحرک نہیں کیا لیکن جنگ کی صورت میں طاقت کے مکمل استعمال سے گریز نہیں کیا جائے گا۔